Inga Naan Thaan Kingu: இயக்குநர் ஆனந்த் நாராயண் இயக்கத்தில் நடிகர் சந்தானம் நடிக்கும் புதிய படம் ‘இங்க நான் தான் கிங்கு’. இந்த படத்தை என்.அன்புசெழியனின் கோபுரம் பிலிம்ஸ் நிறுவனம் வழங்கும், சுஸ்மிதா அன்புசெழியன் தயாரிக்கிறார்.
முன்னதாக, ‘வெள்ளைக்கார துரை’, ‘தங்கமகன்’, ‘மருது’, ‘ஆண்டவன் கட்டளை’ ஆகிய படங்களை தயாரித்த இந்நிறுவனம் தற்போது சந்தானத்தை வைத்து இந்த படத்தை தயாரித்துள்ளது.
‘இங்க நான் தான் கிங்கு’ படத்தில் சந்தானத்திற்கு ஜோடியாக பிரியாலயா நடிக்கிறார். மேலும், முக்கிய கதாபாத்திரத்தில் தம்பி ராமையா மற்றும் மறைந்த மனோபாலா ஆகியோர் நடிக்கின்றனர்.
இவர்களுடன், முனீஷ்காந்த், விவேக் பிரசன்னா, பால சரவணன், மாறன், கூல் சுரேஷ் உள்ளிட்டோர் நடிக்கின்றனர். முன்னதாக இந்த படத்தின் பர்ஸ்ட் லுக் மற்றும் டைட்டிலை கமல்ஹாசன் வெளியிட்டார்.
சமீபத்தில் டி.இமான் இசையில் ‘இங்க நான் தான் கிங்கு’ படத்தின் பர்ஸ்ட் சிங்கிள் ‘மாயோனே’ என்ற பாடல் வெளியானது. இந்த பாடலுக்கு ரசிகர்கள் நல்ல வரவேற்பு கொடுத்தனர்.
இந்த நிலையில் தற்போது இந்த படத்தின் டிரைலர் நாளை வெளியாகவுள்ளதாக படக்குழு அறிவித்துள்ளது. இது குறித்த போஸ்டரையும் படக்குழு வெளியிட்டுள்ளது.
அதில், ‘இங்க நான் தான் கிங்கு’ படத்தின் டிரைலர் நாளை மாலை 4:50 மணிக்கு ரிலீஸாகவுள்ளதாக அறிவிக்கப்பட்டுள்ளது. மேலும், அந்த போஸ்டரில் ‘இரத்னபுரி சமஸ்தானம்’ என்ற வாசகம் உள்ள வேன் உள்ளது.
மேலும், இந்த போஸ்டர் சமூக வலைத்தளங்களில் வைரலாகி வருகிறது. இதனைப் பார்த்த சந்தானத்தில் ரசிகர்கள் படமே ரிலீஸ் ஆனது போல சமூக வலைத்தளங்களில் கொண்டாடி வருகின்றனர். இதனைப் பார்த்த நெட்டிசன்கள் ‘டிரைலருக்கு இந்த அக்கப்போரா?’ என கலாய்த்து வருகின்றனர்.
